टी–२० विश्वकप : नेपाल दक्षिण अफ्रिकासँग पराजित, ऐतिहासिक जित निकाल्न एक रनले चुक्यो - साझाकुरा
सोमवार, असार ३२, २०८१

टी–२० विश्वकप : नेपाल दक्षिण अफ्रिकासँग पराजित, ऐतिहासिक जित निकाल्न एक रनले चुक्यो


editor@sajhakura June 15, 2024

आईसीसी टी–२० विश्वकप क्रिकेटमा नेपाल दक्षिण अफ्रिकासँग एक रनले पराजित भएको छ । नेपाल दक्षिण अफ्रिकालाई हराउँदै सुपर आठमा पुग्ने सम्भावना कायमै राख्न असफल भएको छ । आजको खेल जित्न सकेको भए नेपालको सिनियर टोलीले पहिलो पटक टेस्ट देश दक्षिण अफ्रिकालाई हराएर ऐतिहासिक जित हुने थियो । तर नेपाल असफल भयो ।
दक्षिण अफ्रिकाले जितका लागि दिएको एक सय १६ रनको लक्ष्य पछ्याएको नेपालले निर्धारित २० ओभरमा ७ विकेट गुमाएर एक सय १४ रन बनायो । नेपालका आशिफ शेख सर्वाधिक ४२ रनमा आउट भए । अनिल शाह २७, कुशल भुर्तेल १३, दिपेन्द्रसिँह ऐरी ६, कुशल मल्ल १ र कप्तान रोहित पौडेल २ बलमा खाता नै नखोलि आउट भए । सोमपाल कामी ८ रनमा अविजित रहे ।
अन्तिम बलमा रन आउट भएका गुलशन झाले ६ रन बनाए । दक्षिण अफ्रिकाका साम्सीले ४ विकेट तथा एन्ड्ररिच नटराज र एडन मारक्रमले एक/एक विकेट लिए । त्यसअघि वेस्ट इन्डिजको किङ्सटाउनमा टस हारेर पहिला ब्याटिङ गरेको दक्षिण अफ्रिकाले निर्धारित २० ओभरमा ७ विकेट गुमाएर एक सय १५ रन बनाएको थियो । उसका रिजा हेन्ड्रिक्सले सर्वाधिक ४३ रन बनाए ।
ट्रिस्टन स्टब्स २७ रनमा अविजित रहे । क्विन्टन डि कक १०, कप्तान एडन मारक्रम १५, हेनरिक क्लासेन ३, डेविड मिलर ७ रन र मार्को यानसन १ रनमा आउट भए । कागीशो रबाडा स्टम्प आउट भए । आजको खेलमा नेपालका स्पिनरले उत्कृष्ट बलिङ गरे । नेपालका कुशल भुर्तेलले चार र दीपेन्द्रसिँह ऐरीले तीन विकेट लिए । सन्दिप लामिछाने ४ ओभरमा विकेटविहिन रहेपनि १८ रन मात्र दिए ।
समूहका सबै ४ खेल जितेको दक्षिण अफ्रिका सुपर आठमा पुगिसकेको छ । अब नेपालले समूह चरणको अन्तिम खेलमा बंगलादेशसँग खेल्नेछ । नेपाल पहिलो खेलमा नेदरल्यान्ड्ससँग ६ विकेटले पराजित भएको थियो ।

यस्तै श्रीलङ्कासँगको दोस्रो खेल वर्षाले रद्द भएपछि अङ्क बाँडिएको थियो । आयोजक अमेरिका र वेस्ट इन्डिजसहित भारत, अस्ट्रेलिया, अफगानिस्तान र दक्षिण अफ्रिका प्रतियोगिताको सुपर–आठमा पुगिसकेका छन् ।
श्राेत: उज्यालाे अनलाईन

Leave a Reply

Your email address will not be published. Required fields are marked *