श्रावण १३
संखुवासभा–काठमाडौ जर्नालिष्ट एशोसिएसन (एसकाज)ले आगामी कार्यकालका लागि शंकर खनालको अध्यक्षतामा नयाँ कार्यसमिति चयन गरेको छ । एशोसिएसनको शनिवार भएको साधारणसभाले खनालसहित सर्वसम्मत नयाँ कार्यसमिति निर्वाचित गरेको हो ।
अधिवेशनले उपाध्यक्षमा दिपेश श्रेष्ठ, महासचिवमा उद्धव भट्टराई, सचिवमा सुनिता पोखरेल, कोषाध्यक्षमा द्धारीका काफ्लेलाई निर्वाचित गरेको छ । त्यसैगरी सदस्यमा निमेशजंग राई, मणिराज गुरुङ, कुलचन्द्र बिष्ट, पर्वत बिश्वकर्मालाई पनि निर्वाचित गरेको छ । सल्लाहकारमा हेमन्त गौतम, दुर्गा खनाल र संस्थापक अध्यक्ष दिपेन्द्र वान्तवा रहेका छन् ।
नेपाल पत्रकार महासंघ संखुवासभाको पूर्व सभापतिसमेत रहेका खनाल हाल ईमेज टेलिभिजनमा कार्यरत छन् । लामो समयदेखि पत्रकारितामा आबद्ध खनालसँग बिभिन्न सञ्चारगृहमा रहेर काम गरेको अनुभव छ । त्यसैगरि रोजगार मिडियाका सम्पादक उद्वव भट्टराई एसकाजको महासचिवमा निर्वाचित भएका छन् ।
संखुवासभा काठमाडौ जर्नालिष्ट एशोसिएसनले संखुवासभा जिल्लाको विकास, सामाजिक, आर्थिक, साँस्कृतिकलगायतका बिषयमा जिल्लावासीबीच बिभिन्न कार्यक्रम गर्दै आएको छ । जिल्लाको बिकास निर्माणमा सरोकारवालाहरुसंग छलफल गर्दै समग्र जिल्लाबासीबीचको एकता भेटघाट आदानप्रदानमा महत्वपूर्ण काम गरिरहेको छ ।
पछिल्लो समय विश्वका बिभिन्न देशमा रहेका संखुवासभाली र बिभिन्न देशमा रहेका संखुवासभासंग जोडिएका संघसंस्थाको सम्मेलन संखुवासभा विश्व सम्मेलनको विषयमा पनि एसकाजले समन्वयकारी भूमिका खेल्दै आएको छ ।
श्राेत:राेजगार मञ्च डट कम